ميكساوى للمعلوميات ميكساوى للمعلوميات
فيسبوك

آخر الأخبار

فيسبوك
اخبار
جاري التحميل ...
اخبار

وفٌر فلوسك وأكسب فلوس كمان وصلح جهازك وجهاز جيرانك بنفسك بأبسط الطرق التى لن تتخيلها من على لسان مهندس صيانة محترف

 بسم الله الرحمن الرحيم 

                      السلام عليكم ورحمة الله وبركاته
أخوتى فى الله فى كل مكان من المحيط الى الخليج
                                    طبتم وطابت أيامكم وأسعد الله أوقاتكم بكل خير
النهاردة جايبلكم موضوع  مهم جداً ويهم كتيرمن مستخدمى الكمبيوتر المكتبى!!
الموضوع ده مش إشتغالة او أن أحنا نكتب أى هرى وخلاص لا والله الموضوع ده مهم جداً لناس كتير وفيه أسرار وخبايا محدش يعرفها إلا فنيين الصيانة.

شعارنا وفٌر فلوسك اللى رايحة على الصيانة عمال على بطال وهقولك على شوية  أسرار ضرب نار ...

ولو عايز تكسب فلوس من أوضك الصغيرة وتشتغل من خلال البيت وتعمل ويندوز للناس خليك معايا وتابعنى وهكسبك أحلى فلوس


طبعاً ناس كتير متعرفش الألف من كوز الدرة ورايح جاى على الصيانة وفيه ناس معندهاش ضمير بتستغل الموضوع وقاعدة بتنفض جيوب الناس وفيه مهندسين محترمين برضه وبيتقوا ربنا  علشان برضه ندى كل واحد حقه ومنظلمش حد.
طيب ليه منصلحش جهازنا فى بيتنا ؟
عموما هقولك على طرق تخليك تصلح جهازك فى بيتك وتوفر فلوسك
وفى الحقيقة دى مقدمه لكورس شامل فى صيانة الكمبيوتر واللاب توب هعرفك فيها أزاى تسطب ويندوز من أول نسخ الويندوز على أسطوانة أو فلاشة إلى تسطيب التعريفات والبرامج وكمان شرج أٍطوانة الهيرين بوت (للناس المبتدئة الهيرين بوت دى اسطوانة شاملة هشرحهالك فى الكورس ) وهيكون شرح فيديو متكامل بإذن الله


  • فيه  تكات محدش يعرفها غيرنا أحنا كمهندسين صيانة لدينا خبرة طويلة فى هذا المجال ولا يعرفها المستخدون العاديين وده اللى خلانى أعمل المقال المميز ده عن فنون الصيانة وأزاى أنك تقدر تصلح كيستك ولو معرفتش تصلحها أرميها وريح نفسك

 وهنبتدى سوا نعرف ايه أنواع الكيسات أو أنواع أجهزة الكمبيوتر والأعطال اللى ممكن نصلحها فى بيتنا وأحنا مستريحين وممكن العطل يحصل مثلا الساعة 4 الفجرومش هتلاقى حد فاتح أكيد  فبالتالى هقولك هتعمل أيه بالتحديد

الأدوات المطلوبة " متخافش دى حاجات بسيطة جداً جداً"

1 - فرشاة بوية عريضة ودى موجودة فى محلات البويات والحدادة ب10 جنيه تقريباً
2 - فرشاه أسنان وأستيكة " أو جومة حسب البلد اللى أنت فيها وبتختلف طبعاً من بلد لبلد" أدى 5 جنيه كمان معلش
3 - قزازة 2 لتر حاجة ساقعة  وأكيد مش هيبقى فيها بيبسى يعنى ههههه لا قزازة 2 لتر فاضية وهتروح أأقرب بنزينة وتجيب 2 لتر بنزين 80 "أوعى تجيب 90 أو 95 كده الكيسة بتاعتك هتشررق وتكركر" كده 9 جنيه كمان
4 - 3 حجارة/بطارية كمبيوتر وال3 ب15 جنيه وهات معاهم 4 أكياس معجون للبروسيسور"وهما فوق البيعه طبعاً أوعى يضحك عليك"قول للراجل كده بس وهقولك فايدتهم إيه 
5- مفك صليبة وأكيد الحاج هتلاقى عنده المفكات دى 
طيب كده المجموع 40 جنيه تقريباً وطبعاً ممكن حضرتك تدفعهم فى تصليحة واحدة
طيب هنعمل بيهم أيه ؟ تابع المقال المميز والمثير واللى هيخليك تصلح جهازك بنفسك

ملحوظة هااامة جدااااا : الموضوع ده مش كوبى بست ده من جوة ورشة الصيانة الخاصة بيا وكلها أسرار ومحدش عمله قبل كده والحمد لله وانا تعبت فيه جداً وده سر نجاحنا وبيكم هنبقى مميزين بإذن الله

نبدأ على بركة الله 
نشرح الأول الفرق بين الكيسة التجميع والكيسة الاستعمال الخارج وثانياً هنشرح الأعطال اللى ممكن تقابلها

أولاً الفرق بين الكيسة التجميع والكيسة الاستعمال الخارج

ده شكل كيسة تجميع 
وأنواع الكيسات التجميع المشهورة  بتبقى "جيجا بايتgigabyte" و "فوكس كون foxconn" و "أزروك asrock" و "أسوس asus" و msi و ecs وبايو ستار
وشكل الكيسة التجميع معروفة اللى هى دايما فى كيسة جامبو او اكشن وليها أيدين وطبعاً ليها مشاكل كتير لأن خلاص عفا عليها الزمن وقدمت ومحدش بقه بيستخدمها حالياً وسعر البوردة التجميع جديدة دلوقتى تعمل تقريباً حوالى 800 جنيه وطبعاً ده تمن كيسة استعمال خارج برامات وهارد كمان وأقوى منها 100 مرة

طيب إيه أغلب مشاكلها اللى أنت ممكن تصلحها فى بيتك ؟

1- أهم مشكلة فيها "نو داتا" يعنى إيه بقه؟

يعنى يا كبير الكيس بتشتغل باور عادى جداً بس مفيش اى حاجة بتظهر على شاشة الكمبيوتر نهائياً !! وممكن تسمع بيب رام أو صفارة أو حاجة بتصفر من جوة الكيسة .. متخافش دى الرامات بتقولى نضفنى أبوس أيدك.
أول خطوة وأهم خطوة هتجيب البنزين ال80 وهتجيب فرشاه البوية تمام ؟ هتطلع الرامات وتملى الفرشاة بنزين وتنزل على بنك الرامات"المكان اللى راكب فيه الرامات" وتنضفه بالبنزين ومش هوصيك غرقه بنزين 
وتمسك الرامات وتنضفها بالبنزين برضه وهقولك الرامات بتتنضف أزاى ومتفتكرش أنك هتمشى عليها الفرشاة وخلاص 
بص انا الرامات لما بتجيلى ورشة الصيانة بتبقى مجنزرة "تراب ماسك على بعضه او مصدية" وشكلها بايظة وقديمة فاللى أنا بعمله فى ورشة الصيانة بجيب الرامة أحطها تحت ايدى وبالأستيكة أو الجومة بفرك فيها  وأنزل بعد كده بفرشاه الاسنان أحط عليها بنزين وأفضل أدعك فيها وبالذات المنطقة اللى فيها ايسيهات ومكونات كتير وبترجع أحسن من الاول وبإذن الله تشتغل معاك 

وتسيبهم ربع ساعة وركبهم تانى وأدعيلى " أغلب الاعطال اللى بتجيلى بنسبة 70% تنضيف رامات" 
2- رسائل مزعجة أول ما تفتح الكمبيوتر ويدخل على الويندوز 
دايما تجيلك رساله cimos error وبعدها تديك FI و F2 دى تغير حجارة البطارية وتظبط الساعه من جوة البايوس " وللدخول الى البايوس فيه زرار فى الكيبورد أسمه delete جنب زرار ال enter الكبير ده هتضغط عليه هيدخلك فى شاشه لونها أزرق متخافش ده البايوس يا كبير هتلاقى بقه جمل انجليزى اسمها set time and date أو هتلاقى قدامك الساعه والتاريخ وطبعا مش هتلاقيهم مظبوطين هتبتدى تدخل الوقت مظبوط والتاريخ مظبوط

3- مشكلة الغلق المفاجىء لمتصفحات الأنترنت 

لو أنت شغال على النت والمتصفح كل شوية يقفل ويقولك BROWSER CRASH او اى رساله وبعدها المتصفح بيقفل نضف الرامات كويس ولو أستمر العطل غير الرامات من غير تفكير.

4- مشكلة عدم الدخول الى FACEBOOK او رساله غريبة أول ما تفتح المتصفح 

لو المتصفح مرضاش يدخل فيس بوك او يوتيوب وكتبلك connection privcy وعطالك دايرة فيها ستوب وزى عسكرى مرور كده متقلقش على طول غير الساعه والتاريخ لأنهم مش مظبوطين

5- مشكلة الجهاز بيرستر معاك وكل شوية يقفل ويفتح 

لو جهازك كل شوية يرستر "بيعمل restart" 
أول حاجة بص على المروحة اللى فوق البروسيسور جسها كده لو لاقتها سخنة مولعة هتجيب مفك صليبة وتفك المروحة وتنضف فوق البروسيسور وتحط كيس المعجون كله" فاكر كيس المعجون اللى فوق البيعه؟ هو ده"  فى نص البروسيسور من فوق وتحط المروحة تانى وتربط المسامير عليها للاخر
ملاحظة فنية هامة جداً 
"المستحسن جدا انك لما تربط مسامير المروحة  جامد فك المسامير تكة بسيطة جدا علشان متكتمش على البروسيسور" لو فضل يرستر غير بروسيسور.
تانى حاجة لو غيرت البروسيسور وبرضه بقى بيرستر غير الرامات وش على طول
6- لو كتبلك رساله no system operator او no system found او missing operating system ومدخلش على الويندوز أتاكد ان كابلات الهارد متوصلة كويس 
**لو فضلت كده نزل ويندوز على طول وبرضه لو أدالك رساله missing ntldr"ليها حل غير الويندوز" دى هشرحها فى كورس صيانة الكمبيوتر الشامل اللى جاى بإذن الله
 بكده خلصنا أعطال الكيسة التجميع ولو اى حد عنده أٍتفسار يكتبه فى التعليقات وانا هرد عليه بنفسى.

نيجى بقه للأجهزة  الأستعمال الخارج 

طبعاً الكيسة الأستعمال الخارج معروفة بشكلها وحجمها وتقلها اللى يقطم الضهر
وأنواعها وأشهرها HP , DELL , IBM , LENOVO , SIEMENS FUJITSU
COMPAQ 
                                       أول أعطال جهاز HP
نيجى لأهم عطل بيجيلى فى كيسة HP وده عدى عليا بدرجة فظيعة فى ورشة الصيانة



1- عطل """" اللمبة الحمرا """"
أكيد كلنا عدى علينا العطل ده تيجى تشغل من هنا تديك صفارة ولمبة الباور اللى بتفتح منه الجهاز لونها حمرا وأكتر الناس بتقولك الكيسة أتحرقت وانا هقولك لأ وعلشان محدش يضحك عليك ويقولك الكيسة أتحرقت 
الحل ؟ غير حجر بطارية على طول ونضف الرامات كويس زى ما علمتك
2- عطل نو داتا 
نضف رامات زى ما علمتك فوق
3- TIME AND DATE NOT SET وبعدا يقولك أضغط F1
مشكلة ال F1 دى ساعات كتير بتدايق الناس بس أشهرها ظبط التاريخ والوقت
الحل : أظبط التاريخ والوقت ودى اول ما تشغل الكيسة الHP هتضغط F10 هيجيلك شاشة فيها اللغات أختار أول واحدة ENGLISH وهتدخلك على شاشة زى دى وأول وتانى أختيار ده المطلوب تغييره

أعطال الكيسة ال DELL

أشهرها اللمبة البرتقالى لو اللمبة قلبت للون البرتقالى وثابتة دى إنشاء الله تنضيف رامات وشيك برضه على البروسيسور لو معليهوش معجون حطله ولو فضلت اللمبة ثابت غير بروسيسور.
طيب لو اللمبة بتقيد وتطفى دى توديها لأى حد جنبك بيصلح كمبيوتر لأن دى مشكلة حقيقية فى البوردة بتاعة الكيسة ولازم توديها لمركز صيانة
أعطال الكيسة LENOVO و IBM  لو نضفت رامات وغيرت بروسيسور وحجر بطارية واستمر عطل ال NO DATA وحسيت أن البروسيسور مولع دى بتبقى مشكلة هارد وير ولازم يتسخن تحت قاعدة البروسيسور لأن ده أشهر عطل فيها للأسف
بكده خلصنا طرق صيانة الكمبيوتر فى البيت والأدوات المطلوبة وصدقنى أنا وفرت عليك فلوس كتيروهكسبك فلوس أكتر لما تابعنى وتشوف شروحات بالفيديو ودى من خلال خبرتى فى صيانة الكمبيوتر واللاب توب من فترة خبرة سنين كتيرة
إنشاء الله أنا بحضر كورس صيانة شامل هيخليك بإذن الله محترف صيانة وتكسب فلوس محترمة من الصيانة .
 هنبتدى بيه أزاى نعمل أسطوانة ويندوز على إسطوانات أو فلاشات وأزاى تسطبه بكل سهولة وتنزل التعريفات والبرامج وأزاى تشتغل على إسطوانة الهيرين بوت"HEREIN,S BOOT" وتقسم الهارد بأكتر من برنامج وتعرف هاردك حالته إيه وفيه أعطال ولا لأ وغيره وغيره والمزيـــــــــــــد...

 وهقولك على السر الكبيراللى فيه ناس تعرفه وناس كتير جداً ميعرفهوش
أزاى أنك تحافظ على النسخة دى لمدى الحياة أيووووة زى ما قلتلك كده لحد ما تزهق منها او تغير الكيسة بتاعتك وده هيبقى فى سلسلة إفهم صيانة صح وهعرفك أزاى تنزل ويندوزات  XP,7,8,10
الناس اللى عايزة تعمل مشروع صيانة كمبيوتر جمٌد قلبك وأنا فى ضهرك
أشترك على قناتنا على اليوتيوب علشان يوصلك كل جديد 
https://www.youtube.com/channel/UCQfY6TMSoIeTq-5O-h30TQQ?view_as=subscriber
وأعمل أعجاب لصفحتنا على الفيس بوك علشان يوصلك كل جديد
https://www.facebook.com/Mixawy.channel/
 
الكورس هينزل بالتسلسل وبالترتيب ومنظم جداً

فقط تابعوووووووووووونا









عن الكاتب

Hema Medra ،مدون عربي مصري الجنسية اصيب بجنون التدوين و متابعة الجديد و حب المنافسة في هذا المجال ، وأهتم بجديد التقنيات وتطوير البرامج هدفي من خلال هذه المدونة هو مشاركة كل ما اراه مناسب و جديد و يأتي بالفائدة على الجميع انشاء الله.،

التعليقات



إذا أعجبك محتوى مدونتنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد المدونة السريع ليصلك جديد المدونة أولاً بأول ، كما يمكنك إرسال رساله بالضغط على الزر المجاور ...

إتصل بنا

جميع الحقوق محفوظة

ميكساوى للمعلوميات

2017